Payung Enggau Ujan

Enda semua utai dipeda nuan manah belama. Enda semua utai diasai ke nuan nyamai belama. Mega enda selama-lama idup kitai nyamai, pia ko apai aku bejaku lebuh maya kami seduai nginti aku agi mit suba. Tang leka jaku nya meruan rat nambat tiap-tiap igi pengingat aku.

Siti hari ila, lebuh semua iya udah datai ba ujung. Semua kitai sigi labuh ke baruh nyembah tanah. Nadai sapa selama-lama diau ba atas. Tiap-tiap iya ka ba atas, atai ba putar dunya sigi pulai ke baruh. Utai ke dikenangi, ti kitai udah lama di atas, udah teleba idup senang, pengelabuh kitai ngasuh kitai buruk enseput lembau angkat.

Anang aja maya kitai ka nikal pulai ila. Hari udah suntuk nyukur lemai. Pintu udah tutup nadai jalai tama. Anang udah tepantup ba bandir baru deka malik ke belakang. Maya nya... nadai sapa ngerimbai kitai. Baru kitai nemu, semua utai tok semina diinjau mina nyadi ayam mata aja. Baru kitai nemu, dunya tok mesai ni. Baru kitai nemu tinggi baru langit. Baru tua nemu... maya tusah tua ngiga Petara. Tang semua nya udah laun. Udah nadai agi!