bandung

Mali tekura ngerayap enda tepantup ba bandir. Mali enserur pansut ti seput empai apus. Anang ngaga pengawa mekang-mekang. Mali… penti kitai anak IBAN kebur-kebur maya ngereja. Mali…
Bah… betemu baru kitai kaban, uchu, apai indai menyadi. Suba ba selentang taun baru kitai berandau. Enda bula ari bangat jampat bekalih. Diatu nyau nyambut Hari Gawai ga kitai. Pengerami lumur satu kitai anak dayak ke lebih agi mensia ti begelar Anak Iban. Enda mudah Iban lenyau ba dunya!
Baka aki lemambang, taun tu meh taun ti ke terubah aki enda ngau ngintu Hari Gawai. Enti baka ngelama tu, aki meh tukang timang tukang perindang lebuh maya Hari Gawai. Taun tu enda sebaka. Aki enda ulih ngintu Gawai baka selama enggau bala pangan, bala menyadi, bala isan aki ba rumah panjai din. Sinu ga ati! Tentu sida ya nganti penatai aki. Ukai ulih bepesau ngena talipaun kin deh. Ketegal rumah panjai aki agi bedau didinding ngena akar kara, agi dibalut madang kelindang, disempidang damun paku keru. Rumah panjai aki empai digulu arus pemansang. Tang semua nya meh ngajar aki ransing, enda mudah tekuing, tebimbing diuji taja diujan enggau seribu penyaru ti tau ngasuh mata kelabur. Nadai ngawa, ngagai petara aki besampi ngarap sida ya gerai serta ulih nyambut ari gawai enggau jelan ya pengerami meh.
Aki ukai enggai pulai, tang bisi pengawa ngasuh teberunsa nyema enda digaga. Enda ulih diteju ke agi. Telan mati apai, lua mati indai. Nitih jaku orang meh. Kitai ga gawa enggau orang. Ni ko orang. Aki danjung perintah menua Malaysia tu ngagai Indonesia kena 10 ari bulan empai lama. Di asuh Kementerian Pengajian Tinggi (KPT) ngaga pansik ba Laboratorium School Percontohan, Bandung, Indonesia. Sekula tu bala uchu, apai indai menyadi, sekula chunto ba menua Indonesia. Lab-School tu berimbai enggau Universitas Pendidikan Indonesia. Lalu pengelama aki diasuh orang ngajar enggau belajar ditu ianya 5 minggu.
Seminggu udah aki ditu, mayuh utai nyelai ba menua orang tu. Chara nembiak sekula, chara pengajar ngajar. Sistem persekolahan, semua enda sebaka enggau Malaysia. Nembiak ke ulih tama ngagai sekula tu semua nembiak elit magang. Senang disebut, ukai nembiak sengapa. Sekula swasta, nembiak kaya serta pintar! Anang kita saru penemu nyengkining Indonesia ngena sepiak mata aja. Udu berasap-berasap ga pending aki lebuh maya masuk kelas kasak ke bala nembiak Indon ditu. Nasib ga aki udah sedia, nyikap diri enggau penemu dikena ngeruntuh ke ego bala nembiak ti meruan deka nguji mensia ti begelar pengajar. Nya ndang sigi udah tanggungjawab pengajar! Mayuh tanya ti ngasuh runding pawar dilua serta ditikau ke bala nembiak ditu dijangka ke aki sengaja dikena sida ya nguji penemu aki. Nya alai kitai ti begelar pengajar mesti naka alah nyedia ke diri enggau penemu ba bidang kitai empu ngambi enda rangap-rangap maya diansak bala nembiak.
Ukai senang ga ti aki ngigat suba, bakani kati aki tau dipilih orang ari beratus ke minta. Besemekih enggau bala Laut, Tambi enggau Cina ti sigi udah tampak rita, bansa bepenemu tinggi ba menua kitai tu. Ukai mudah ka enselit ke diri ari bala sida nya ngulih perujik tu. Mayuh macham rengka diuji orang ngambi ka orang ke dianjung beamai-amai layak nyadi Duta Perintah Menua Malaysia ngicha ke prujik tu enda pulai ngagai pengerugi. Puji tuhan, berkat ari pengeransing ati aki disempulang ke enggau sampi aki ngagai petara aki ulih tuchum puas diatu. Aki udah nyapai juluk ati. Ukai ka ngemegah diri, ukai baka landak nandang ke baga, enda mega baka ular mantai ke sima. Semina ka bekunsi enggau bala kitai anak Iban jerita pengidup diri ngiga penemu ba menua orang. Ngambi bala kita pegila lusa ngembuan ati ti chakah serta ransing lebuh maya ngagai juluk ati diri empu. Nadai utai enda ulih! Semua penanggur bisi chara mutar ke ya. Sama-sama meh kitai niri negi ke bansa kitai.
Ila ti aki dah pulai ke menua, aki bekunsi enggau bala kita cherita sepemanjai aki nguan menua orang tu. Mayuh utai nadai nyadi ba menua kitai nyadi ditu. Ngagai kita bala uchu, aki nadai tentu ulih reply kumin bala kita ketegal ditu pedis amai ka online. Mupuk dulu aki, selamat Hari Gawai ngagai bala kita. Ngajih ke gerai nyamai, lantang senang nguan menua.