Mupuk Dulu

Pulai meh aki, udah pemuas belelang. Tu taun ke empat udah nguan menua orang. Mupuk mulai ke diri ngagai sarang asal. Nuju penatai suba. Mayuh pengigat manis enggau pait sekumbang ngejang pansut ari sarang suba. Semua diatu tinggal kenang. Kenang ti enda mudah lelang pia aja.

Nama pengawa dah tok deh? Nguan langkau umai meh dah tok. Nangkar, ngasu, begiga ke ikan. Nya aja naka utai ke temu. Belelak dulu pengudah bendar ngeranjai ngesai ke bulu siga ngelama tu.

Hahhhhhaiiiii lengki.... bye2 UKM. Thank you 4 everything.....

Anak Lelang

Great Wall

Lama amai blog aki tu dah enda dijengguk nadai dikerituk. Awak ti majak dichuri, maya ti majak suntuk ngasuh semua pengawa beblog tu nyau majak lari. 2-3 minggu tu tak nadai ngetu kasak pengawa. Kin kia runding nyau kusut. 23-30 hari bulan 3 mpai lama aku bisi kem ba Pulau Langkawi. Ngelaban panas din. Mayuh meh pengawa digaga pengelama seminggu din. Pulai ari Langkawi, 2-8 hari bulan 4 terebai ngagai Beijing menua China. Nasib ga maya atai din udah abis musim snow. Ti enda parai tengkering meh aki tu. Taja udah abis snow, tang menua nya agi bedau diparit musim chelap.0-5 degree takar penyelap maya nya. Kira ok meh nya, just nice ko orang. Raban kami kin empai lama ketebal agi nembiak Master enggau PHD Sukan ari UKM. Aku nembiak undergred ke pilih orang enggau ngeruh ai dalam pogram tu. Berasai temegah ati ga ulih ngari ke bansa kitai nyelat bansa bukai ke tinggi agi pelajar dalam pogram tu. Nyadi penyampau raban kami ianya 25 iku. Tuju pejalai kami empai lama diasuh Kementerian Pengajian Tinggi enggau kerjasama UKM mansik gaya training bala atlit menuanya ba Beijing Sport University (BSU). Penyampau mensia ti besekula ba BSU tu semina 25 ribu iku tang dalam Sukan Olimpik empai lama universiti tu ngari ke menua China bulih 16 pingat emas. Enti semua mensia ba Asia tenggara tu digempuru ke maggang penyampau pelaba aki lebih 200 juta empai ulih napak penguat BSU tu. Nya meh alai bala raban kami berasai temegah ulih tepilih datai kin ngaga pansik. Amat ngasuh ranggap-ranggap ga gaya sida training sambil belajar. Ari pemakai sampai ngagai pengerai bala atlit menua nya dijaga orang enggau naka pengelikun. Enti skali berati, sida tu baka orang dalam rumah pasung. Nama ti ngasuh ati alit, enti ditanya, sida ya gaga digaga bakanya. Bala atlit tu sanggup bekorban nama-nama aja kena nyaga nama menua sida ya. Bebida enggau etika atlit menua kitai.

Forbidden City

Pengelama seminggu din, mayuh ga alai endu bejalai maya lepa. Utai ti paling deka dipeda ianya great wall. Ulih ga ngenatai ke diri ba 7 ari utai ti ngalit ke ati ti bisi ba dunya tu. Great Wall tu digaga perintah China 5000 taun ti lalu. Amat ngalit ke ati enti kita ngenatai ke diri ngagai Great Wall tu, bakani orang cina suba nusun batu ba atas tingkah enggau tebiang renjan sepemanjai 5,600 kilometer dikena maggar Beijing. Kebatang orang cina ngaga pagar tu dikana ngetan ke diri ari diserang Bansa Monggul. Ngagai Forbidden City bisi ga, alai pendiau raja menua China kelia. Forbidden City tu baru agi, digaga 500 taun ti dulu. Baru-baru pen, lama meh tu. Kitai berandau ke sejarah Kota Atmosfera, utai tu dulu agi udah digaga orang cina suba. Forbidden City tu bangat besai, enti bejalai ari pintu mua ngagai pintu belakang ngambi masa 2 jam. Bayang ke kita empu meh... Semua kerasa enggau perengka ti digaga bansa Cina tu agi bedau serta likun nyentuk ke sari tu.

Stadium Olimpik

Kati baka antu pala ulih bala aki inek kitai ngayau 70 taun ti dulu, kada agi disimpan kini. Ni tajau pesaka bala kita deh uchu? kada agi disimpan, kada enda udah abis belah, dibuai sengapa. Kitai iban kemaya hari tu, mayuh enda nemu ngemida ke pengarap, adat enggau sejarah. Sekeda ke luba-luba, semua pengawa enda tau dikereja agi.Ka nya salah, ka tu salah. Nadai utai ke ngena. Nadai salah kitai nyimpan adat enggau keresa lama kitai, ngambi bisi dipeda anak uchu kitai ke dudi hari ila. Ngambi sida enda ranggap-ranggap baka baka ikan belau nyema bansa bukai nanya.

Pangkor Lagi

Teman terbang ke Pangkor lagi. Entah berapa kali dah teman datang ke Pangkor. Mula-mula dulu memang lah suka, tapi dah banyak kali macam ni teman dah mula bosan. Asyik-asyik pegi tempat yang sama. Kali ini teman akan mengiringi Pelajar Tahun Pertama Pendidikan Sukan Dan Rekreasi UKM menjalani aktiviti di sana. Aktiviti yang sama juga akan dijalankan tapi melalui pendekatan dan kaedah yang berbeza.

Walaupun jemu datang ke Pangkor, tapi teman tetap teruja datang ke sana. Teman tetap akan datang ke sana juga satu hari nanti. Ke tempat yang sama, pantai yang sama, pokok yang sama. Kerana cinta teman bermula di sana...

Kursus Pengadil Kriket

kena 13 sampai 17 ari bulan 8 tok empai lama aku bisi ngau siti kursus pengadil kriket anjuran Kementerian Pengajian Tinggi Malaysia. Kursus pengelama 5 ari bepandam tu empai lama diatu ba Universiti Kebangsaan Malaysia. Berat ati diasuh orang enggau kursus tu mula ya, ketegal aku nadai nemu mimit pen pasal main kriket tu. Ti main solfball, nemu ga aku undang-undang ya. Enda ga ngumbai diri pandai, tang ti asuh orang nyadi umpire sukan universiti agi diterima orang ga. Taja pia, udah pemuas berunding, pengujung ya aku nurun ga. Ukai nya ngasuh rugi ko jaku. Free memagang, makai endur diau enggau semua diberi orang free. Udah dibayar KPT. Ti asai enda nyamai badu enggau ga ila ko jaku. Sapa nemu main tu ngasuh ati rindu kini??? Belum kenal, belum cinta ko jaku sempama laut. Nguji ngapa meh. Pia ko jaku dalam ati.

13 ari bulan aku start melapor ngau kursus tu. Mayuh ga bala mensia dipeda ari keterubah tu. Kira pukul 9 pagi pia, datai dua iku orang di diberi tanggungjawab ngatur kursus tu ngagai kami. Bansa tambi enggau siko agi cina. Mr. Sri Muragai enggau Mr. Khoo Chai Huat ari Persatuan Krikit Malaysia. Nyau bekeliko-bekeliko bala seduai ya tama kelas lalu bejaku ribai. Tuchu diri aku meda bala laut nyau mut-mut beperening pangan diri kasak ke seduai iku tu.

Maya ngetu merarau tengah ari nya, endang sigi udah gaya aku. Lalu napat ke mensia mayuh. Ngerandau betanya ke asal serta latar belakang pangan diri. Tebal agi bala ke datai enggau kursus tu bala sida ke udah gawa, bala pegawai polis enggau sedadu bisi mega bala pensyarah. Betanya ke umur pangan diri, akai aku meh biak ke kami.

pengigat ba bandung

Kawah Tengkuban Perahu


sebulan udah aki diau ba menua Bandung Indonesia tu. Macham pengigat manis ngau pait udah dia asai sekumbang betansang ditu. Mayuh macham ulah mensia ditu ngasuh tuchum kediri maya ngenang. Nya meh, lain menua nyelai ga ulah ngau perangai. Bandung... angka mayuh kitai Iban empai kala ninga menua tu. Pia mega aki, sebedau datai ditu aki mega nadai nemu pasal menua dikumbai bandung tu.

Bandung tu siti ari nengeri ba menua Indonesia. Daerah ti ngembuan kepadatan penduduk paling tinggi ba dunya. Sapa pechaya? Aki pen baru nemu info tu pengudah diberi penerang ari Rektorat Universitas Pendidikan Indonesia. Suba dikumbai aki daerah ba menua China meh paling ngembuan kepadatan penduduk paling nyampau meda menua China tu ngembuan penyampau orang ti paling mayuh ba dunya.

Menua bandung tu mega digelar orang Kota Membeli Belah... Syurga memeli belah munyi ko sekeda orang ke dirandau aki. Apu... amat ya bala uchu. Mayuh barang murah-murah dijual orang ditu. Barang-barang branded pemilih ditu. Kualiti enda ibuh nanya. Ambi ke banding, kasut running shoes nike ti ba Malaysia rega RM 350 ba bandung ulih dibeli enggau rega RM 140. Tanchut jean BMW, ba malaysia... enda ulih dikena nya. Kedai pen jarang nyual tanchut nya. Ti ditu, bisi duit RM100 kitai ulih meli siti. Amerika ngau mayuh menua Eropah pen ngimport barang ari menua tu. Tang ya ke dianjung orang kin udah semesti ya gred 1 magang. Nadai orang ribai ka negana baju nipis-nipis.

Siti agi ba menua tu ti ngasuh ati tekait, iyanya mayuh ngembuan endur ngelantang ke ati. Tengkuban Perahu siti ari kawah gunung berapi akitif ba menua Indonesia. Aki empu enda kala tefikir ulih datai ngagai gunung berapi. Tang semua mimpi nyadi nyata pengudah aki datai ngagai bandung. Meda gaya gunung berapi aktif sigi enda ulih lenyau ari kutak pengigat aki. Pengigat nya disimpan sampai parai. Ngerendam telu dalam ai angat ari ai baruh tanah ba kawah gunung berapi siti pengigat manis ngagai aki.

Bandung tu mega bala uchu siti endur ti chelap ketegal ti ba atas gunung. Malam terubah aki datai ditu, nadai tentu uli mandi. Ai anchi penyelap. Nyau asai mandi ngau ai ais. Malam tinduk bebungkul apus. Nyau terengkah ba tulang asai penyelap ya. Kelalu chelap menua tu. Semina enda pansut salji aja. Ti kita kala ngagai Cameron Highland ba menua Pahang, kurang lebih bakanya meh penyelap ya. Bejaku malam nyau pensut asap ari mulut ketegal ti chelap.

Siti ari budaya orang menua tu, nipu! apu... bula ngumbai kita enda ditipu ti datai kitu. Nipu kelalu balat orang ditu. Ukai ka ngenakut ke sapa-sapa. Tang nya realiti! Dini-dini bisi orang nyadi baya ba menua tu. Lebih agi nuan ditemu orang datai. Udah meh... Lalak bulu pala ditipu orang. Ti ka kitu, kita mesti bisi kaling ti bisi nemu-nemu mimit pasal menua tu. Nepan angkot(taxi) ko kitai, tambang nadai kala tetap. Sekejap RP 1500, ama utai RP 2000 enda lama RP 3000 ti tekena ke ya ke antu agi. Budaya nipu ditu udah nyadi biasa. Semua orang nipu, ari anak mit sampai ngagai besai tuai, ari pengemis tisi jalai nyenuk ngagai orang kaya. Ti meli barang mesti pandai nawar. Ti rega barang RP 100 000, pinta RP 50 000 aja. Ti ya enggai mindah aja ari kedai nya. Nemu ya ngagai nuan baru nunduk ngasuh meli setuju ngau rega kitai. Bula ke mayuh agi ngau sida ya nya. Semua ka ngiga peluang makai orang.

Nama-nama pen... aki kuchau-kuchau ngapa bejaku nadai guna. Kita ninga aja enda ngasai nama reti. Ti bisi maya lepa duit belanja bisi lebih. Tau meh bai bala sebilik nemuai kitu. Mayuh utai best ditu bala uchu. Ya ke jaie nya enda ibuh kitai ngerandau. Nyema pen sida ya nipu. Kitai mensia ti bisi diberi petara akar enggau runding mesti anang enda beringat ga. Sekali kena tipu cukup meh nya. Anang jugau dom!

bandung

Mali tekura ngerayap enda tepantup ba bandir. Mali enserur pansut ti seput empai apus. Anang ngaga pengawa mekang-mekang. Mali… penti kitai anak IBAN kebur-kebur maya ngereja. Mali…
Bah… betemu baru kitai kaban, uchu, apai indai menyadi. Suba ba selentang taun baru kitai berandau. Enda bula ari bangat jampat bekalih. Diatu nyau nyambut Hari Gawai ga kitai. Pengerami lumur satu kitai anak dayak ke lebih agi mensia ti begelar Anak Iban. Enda mudah Iban lenyau ba dunya!
Baka aki lemambang, taun tu meh taun ti ke terubah aki enda ngau ngintu Hari Gawai. Enti baka ngelama tu, aki meh tukang timang tukang perindang lebuh maya Hari Gawai. Taun tu enda sebaka. Aki enda ulih ngintu Gawai baka selama enggau bala pangan, bala menyadi, bala isan aki ba rumah panjai din. Sinu ga ati! Tentu sida ya nganti penatai aki. Ukai ulih bepesau ngena talipaun kin deh. Ketegal rumah panjai aki agi bedau didinding ngena akar kara, agi dibalut madang kelindang, disempidang damun paku keru. Rumah panjai aki empai digulu arus pemansang. Tang semua nya meh ngajar aki ransing, enda mudah tekuing, tebimbing diuji taja diujan enggau seribu penyaru ti tau ngasuh mata kelabur. Nadai ngawa, ngagai petara aki besampi ngarap sida ya gerai serta ulih nyambut ari gawai enggau jelan ya pengerami meh.
Aki ukai enggai pulai, tang bisi pengawa ngasuh teberunsa nyema enda digaga. Enda ulih diteju ke agi. Telan mati apai, lua mati indai. Nitih jaku orang meh. Kitai ga gawa enggau orang. Ni ko orang. Aki danjung perintah menua Malaysia tu ngagai Indonesia kena 10 ari bulan empai lama. Di asuh Kementerian Pengajian Tinggi (KPT) ngaga pansik ba Laboratorium School Percontohan, Bandung, Indonesia. Sekula tu bala uchu, apai indai menyadi, sekula chunto ba menua Indonesia. Lab-School tu berimbai enggau Universitas Pendidikan Indonesia. Lalu pengelama aki diasuh orang ngajar enggau belajar ditu ianya 5 minggu.
Seminggu udah aki ditu, mayuh utai nyelai ba menua orang tu. Chara nembiak sekula, chara pengajar ngajar. Sistem persekolahan, semua enda sebaka enggau Malaysia. Nembiak ke ulih tama ngagai sekula tu semua nembiak elit magang. Senang disebut, ukai nembiak sengapa. Sekula swasta, nembiak kaya serta pintar! Anang kita saru penemu nyengkining Indonesia ngena sepiak mata aja. Udu berasap-berasap ga pending aki lebuh maya masuk kelas kasak ke bala nembiak Indon ditu. Nasib ga aki udah sedia, nyikap diri enggau penemu dikena ngeruntuh ke ego bala nembiak ti meruan deka nguji mensia ti begelar pengajar. Nya ndang sigi udah tanggungjawab pengajar! Mayuh tanya ti ngasuh runding pawar dilua serta ditikau ke bala nembiak ditu dijangka ke aki sengaja dikena sida ya nguji penemu aki. Nya alai kitai ti begelar pengajar mesti naka alah nyedia ke diri enggau penemu ba bidang kitai empu ngambi enda rangap-rangap maya diansak bala nembiak.
Ukai senang ga ti aki ngigat suba, bakani kati aki tau dipilih orang ari beratus ke minta. Besemekih enggau bala Laut, Tambi enggau Cina ti sigi udah tampak rita, bansa bepenemu tinggi ba menua kitai tu. Ukai mudah ka enselit ke diri ari bala sida nya ngulih perujik tu. Mayuh macham rengka diuji orang ngambi ka orang ke dianjung beamai-amai layak nyadi Duta Perintah Menua Malaysia ngicha ke prujik tu enda pulai ngagai pengerugi. Puji tuhan, berkat ari pengeransing ati aki disempulang ke enggau sampi aki ngagai petara aki ulih tuchum puas diatu. Aki udah nyapai juluk ati. Ukai ka ngemegah diri, ukai baka landak nandang ke baga, enda mega baka ular mantai ke sima. Semina ka bekunsi enggau bala kitai anak Iban jerita pengidup diri ngiga penemu ba menua orang. Ngambi bala kita pegila lusa ngembuan ati ti chakah serta ransing lebuh maya ngagai juluk ati diri empu. Nadai utai enda ulih! Semua penanggur bisi chara mutar ke ya. Sama-sama meh kitai niri negi ke bansa kitai.
Ila ti aki dah pulai ke menua, aki bekunsi enggau bala kita cherita sepemanjai aki nguan menua orang tu. Mayuh utai nadai nyadi ba menua kitai nyadi ditu. Ngagai kita bala uchu, aki nadai tentu ulih reply kumin bala kita ketegal ditu pedis amai ka online. Mupuk dulu aki, selamat Hari Gawai ngagai bala kita. Ngajih ke gerai nyamai, lantang senang nguan menua.