Aku Iban?

Bula.. bula… bula… Bejaku tempa ke buah pemula. Pelanduk selalu enda ingat ke panjuk, tang panjuk enda kala enda ingat ke pelanduk. Enda manding ga kelalu bejaku bula. Kaban pen enda rindu. Kati kita rindu meda mensia udu bula? Mit kumbai besai, nadai sebut bisi. Enti enda nemu padah enda nemu aja meh. Ukai nya pedis ngaku pemalui diri. Nadai utai dikemalu ke nya. Nadai akih ke ketawa ke nuan nya tau kaya ngenyit udah ketawa. Kita enda meh patut lalu meragai parai nyema diketawa ke orang.

Agi bisi ga bala Iban malu diri ngaku diri iban… Akai dai apai, kasih amat meh nuan nya deh akan. Enda nemu penatai diri. Pemendai nya endur mandi, dia ga ka endur bira. Jelatung nya alai penyangkai, dia ga endur muai sampah? Enda ke nuan mapap!! Sinu aku meda nuan bangat ngayah ke diri bakanya kaban. Untak nyau engkah ba pala patung.

Kapa ka malu ke bansa diri. Merinsa pen bansa kitai enda kala minta pemakai ari orang bukai. Rumah panjai kitai nadai karan nadai ai, enda kala kitai capuh bedawa ngagai orang bukai. Ukainya reti bansa kitai jugau alah dikeduan orang tang nya tanda pengeliat ati bansa kitai. Iban enda mudah engkasak sengapa. Iban enda jampat engkuda nyema pala enda diindik. Kitai bisi chara diri empu dikena mutar ke penanggur.

Nya meh alai bala kitai patut nemu sejarah turun temurun bansa kitai Iban. Ukai aku luba-luba ngumbai diri pandai. Aku pen belajar baka kita. Tang ati aku semampai ka nemu… ka nemu silik pasal bansa kitai. Kita generasi diatu udah cakah penemu dagih ati aku. Udah mayuh pandai bidik lansik pasal dunya IT. Udah pandai nengkebang laman fs kediri empu… Uji sekali sekala search ba internet pasal bansa Iban. Ooooo… kaban, udah mayuh bansa kitai udah nyadi orang bepemandai. Mayuh bala kitai udah ngaga blog kediri empu. Baca meh, engka tau nambah ke penemu. Engka mayuh kita enda berati ke sepil bansa kitai iban empu. Iban bisi ngembuan rahsia kediri empu enti kita ka nemu. Uji kita macha sepil IBAN ari belakang… Nama penyadi?

Ukai nya pedis betanya maya bepansa. Nadai aku kala minta andak nuan engau piring lapan. Enda kala aku ngasuh nuan miau aku enggau selanjau ijau labang maya berandau. Cukup enti nuan meri tuchum. Ukai nya dijual deh… enti ulih meli engka patut ga nuan rangka. Sigi gauk ke pangan diri meh nya, meda sama bela Iban.
Bangat pama amat nuan akih? Kering nuan? Lapa enda kala dinga rita enggau orang boxing. Pandai nuan? Kapa ka sekula ditu enti nuan bangat pandai. Bajik nuan? nadai ga kala dinga rita enggau orang pekit kumang. Aku enda ibuh, sigi enda kala ngaku diri sigat ari mit kelia munya. Sigi purih jagu kepul iku, sigi baka kali rimpak pemegai. Anang nuan salah sangka akih, ukai ka mekit nuan tu. Semina ka nelai nuan ambi pegila lusa enda agi bekelesie pangan diri. Nyema aku salah, nuan tau meh ngelalau. Aku senurut enti betul enggau chara ya. Enda bepilih baik tuai biak kitai sama bela tau nangkan pangan diri. Nadai salah nya mang. Nadai siku kita lebih ngelui ari pangan diri. Semua udah tatak petara. Nyema nuan bisi pengelebih mimit ari orang bukai anang enda ingat meri terima kasih ngagai petara. Semua nya pemeri ari ya.

Sori, ampun sepuluh jari aku tusun nyema sekeda kaban bisi ensiban ati. Nadai hari aku ka bejaku hipokrit. Aku madah utai ke amat. Ukai nya juluk ati aku ngasuh kita pedis ati. Aku ndang sigi orang rangkai jaku. Ukai reti nya kami orang tinggi jaku. Ngemaruh ke diri enggau ngelemi ati diri enda sama. Ular ensuruk baruh rau enda lenyau meh bisa. Nyema manah ambi ke lalau, tenggau pengidup dudi ari. Tang nyema jaie tau dibuai teju ke tisi aja.