ahhh.... tension mat

Malam tadi kami bala nembiak iban ba alai sekula ditu beaum ka ngirup sebedau exam. Kami mupu duit Rm 20 siku dikena meli ai ngau bala anak tabas. Ka kena muai tension sebedau exam meh ko jaku. Kami begempuru ba bilik aku. Start ngirup ari pukul 8 lemai nyentuk ngagai pukul 2 pagi.

Udah abis pengawa ngirup nya, start meh pengawa gila. Udah mabuk mali enda segau-segau ti palau memekang. Madah diri lapar perut bala sekeda, mai lepak ngagai mapley(kedai mamak). Aku nurut aja, lalu aku meh nyadi tukang angkut. Muto siti aja, kami tubuh enam iku. Tama pansut meh ari gate nya berangkut ke bala.

Pukul 3 pagi kami semua abis makai. Berengkut baru ga aku nganjung bala pulai, nyau kelut-kelut ko Pulis budu nyaga alai kami sekula tu. Aku enda memunyi aja, enggai bejaku maya ya nanya, enggai temu ya udah ngirup. Pemuas berangkut nya tadi, enda mukai-mukai muto sikal aku nya tadi nyau ngerantar atai ba siti tiku. Zaaaapppppp....... bah. Nyau sunyi enda lama laban ya. Nadai utai enda memedis nya. Lama aku meluku dia ngenat ke diri. Ukai bisi orang maya nya ngenyah aku. Nyau ka luput asai ya tepangka rusuk. Puas narit seput. Riur nyau entali aja. Enda nemu bakani ka nusi. Nasib ga halmet kena aku nya tambit aku terit. Ti enda engka balat gi pala aku bakal. Mua aku.. idung rimpak, kuyu abis tekelusu, tunjuk jari ngau kaki nyau pasut lemak.

Udah meh asai ya lantang gi seput. Baru aku gadai-gadai ngangkat ke muto aku nya tadi. Nasib agi ka nyadi start. Aku lalu mulai ke diri ngagai bilik. Semalam-malam nya aku enda tinduk. Ukai bisi ubat, ngetat ke diri aja meh aku. Nyau getak-getak isi bai telih nyau bepedi. Ya ga minggu dudi aku ka test. Madai isi aku ti baka tu.

Pesan aku ngagai bala kita kaban, ti dah ngirup, mabuk enda ibuh mindah aja meh paling manah. Mayuh tindakan kitai ti udah mabuk antara kitai bemimpi enggau dunya nyata. Antara sedar enggau enda. Pengawa enda kala dikereja kitai lebuh maya enda mabuk pen dikereja udah nya. Tinduk enti pala udah palau. Nyamai gi kaban ari ngetata ke diri ti udah pedis baka tu.